冬瓜豆腐

真係冬瓜豆腐喎。不過唔係有乜「三長兩短」。

冬瓜切粒，豆腐切片。兩樣唔係要整成一樣。分開兩樣。

冬瓜粒同粉絲肉片一齊煮，怕涼可以加兩片薑，好快就整出呢味色香味都算唔錯喇。

切片豆腐嘛，先放在碟底，上面放鯇魚腩，再鋪上條薑絲。當然係蒸啦。熟後淋豉油。魚固然保留鮮味啦，呀豆腐呀，索魚油同豉油，味道都唔錯。

冬瓜豆腐，一齊做，有乜唔妥喎。

粵語關雎

《詩．國風．周南．關雎》原詩如下﹕

關關雎鳩，在河之洲。窈窕淑女，君子好逑。

參差荇菜，左右流之。窈窕淑女，寤寐求之。

求之不得，寤寐思服。悠哉悠哉，輾轉反側。

參差荇菜，左右采之。窈窕淑女，琴瑟友之。

參差荇菜，左右芼之。窈窕淑女，鐘鼓樂之。

用廣州話，可唔可以咁樣譯寫呢（希望唔會畀人打崩頭）﹕

魚鷹關關對住唱，停河中小島上。

心善人靚好姑娘，君子好想做對象。

高高矮矮荇菜，左左右右揀採。

心善人靚好姑娘，覺發夢都想追。

追極總係難如願，覺發夢心更牽。

成晚變得流流長，只係碌來又碌去。

高高矮矮荇菜，左左右右揀採。

心善人靚好姑娘，彈琴撥瑟為愛佢。

高高矮矮荇菜，左左右右揀採。

心善人靚好姑娘，鼓鐘只為佢開懷。

食乜

先去豬肉檔買腩排。講要幾多錢，肉檔伙記揀幾塊，再切半塊，拋上電子磅一秤，好。

我即時讚佢一句﹕果然犀利。佢笑笑口，問我係咪蒸。我話係。佢就切得細o舊。果然知我心意。

再去雜貨舖買酸梅麵豉醬。好的式，細細包，三蚊雞。係咁多。哈哈。

跟住去菜檔買菜。本來想食西蘭花，但係幫襯開檔冇西蘭花，菜芯睇上去幾靚，咁就改買菜芯。重要一包蒜頭。

菜檔妹失魂，冇計蒜頭錢。畀錢時我問點解唔畀蒜頭我，佢先有傻更更咁，笑笑口話一心只係諗住菜芯。買慣買熟，都唔會呃對方，自然幫襯得開心啦。

唔，有菜又有肉，幾健康，呢餐算唔錯啦。

幾個字

想到要讀《易經》時，當然預計會有很多不懂的深字，倒是沒想過比讀「四書」要複雜得多。莫說很多字見所未見，聞所未聞，沒有註音註釋，真的有如看天書。

其實，也有些字見慣見熟，老友鬼鬼，好像淺易得很，卻又不是想像中那麼好解易明。一個「亨」字，在同一卦中，卦詞、《彖傳》、《象傳》有時解作「通順」的「亨」；有時卻又是「享」。是亨不是亨，是亨又是享。頭都大，腦更脹。

「孚」字尤其撲朔迷離，你一時說是「俘虜」，他卻說是「相信」。孰是孰非，我算是「相信」自己已成「俘虜」好，還是什麼都不相信呢。

我看的那本譯注本，雖然一一列出各種解釋，再來一番推理，也未必就可確信。正如作註者也說，有些地方實在不可解。有時既因脫字錯簡，有時也因標點各有看法，也就出現歧義。

還是那句話，拿《易經》來占卜，難免不時遇上這種情況，該如何解釋卦文意思，有時豈不是要「撞手神」？一個唔好彩，占對了卻解錯了，該實行而沒去做，真係死都唔知乜事。

有些字，例如「臬」字旁一個「危」字和「兀」字，即【臲】【臬兀】（一個字），讀作「孽兀」，解釋很簡單，就是「不安全」。不過，轉個頭我就忘記了。

另外，「汔」字只是少了一橫劃，很容易誤以為是「汽」字。其實「汔」讀作「迄」，解「水涸也」。

我有時會邊看邊查《古代漢語詞典》（商務版，收一萬單字），也真怕找不到要找的字。

瀏覽完《易經》，真要看一些小說之類的書了。不然真怕有如走進百花林中，草木不分，但覺花香迷人，一時迷迷糊糊，不知身在何處，心在哪方。